SOLLICITANTES

SOLLICITANTES

dicuntur in Communione Romana ex Confessariis illi, qui in Confessione sollicitant et provocant, seu sollicitare et provocare tentant teneriorem sexum ac aetatem, ad actus inhonestos, contra quos Bullam edidit Paulus IV. Cum sicut super. et Pius Iv. nec non Gregorius XV. in qua Pauli Bullam confirmat, illamque non solum in Hispaniarum regnis, sed in quibusvis Christiani Orbis partibus observari praecipit, cum priores tantum de Hispaniae Confessariis sonarent. Ut alia Edicta et Constitutiones omittam, quibus omnibus ansam praebuit Sacerdotum luxuria, Bullâ Pii IV. A. C. 1564. d. 6. April. graviter notata, non tamen eô successu, qui sperabatur. Convicti de huiusinodi crimine Confessarii, praeter paenitentias salutares, ut ieiunia, orationes et similia, digni iudicantur, ut damnentur ad triremes per quinquennium vel septennium; item ad carcerem perpetuum, imo aliquando (ad arbitrium tamen Cardinalium Supremorum Inquisitorum.) ut brachio saeculari tradantur, prout disponitur Constitutione Gregorii praefati. Debent quoque suspendi in perpetuum ab audiendis Confessionibus, privari beneficiis, dignitatibus, voce activâ et passivâ, ad arbitrium inquisitorum. Confessariis regularibus potest imponi, quod teneant ultimum et infimum locum inter regulares sui Monasterii. Et aliquando debent Inquisitores mandare, ut sententia contra Confessarium regularem publice legatur in proximo Capitulo suae religionis generali, ad aliorum terrorem et exemplum. Anton de Sousa Aphorismis Inquisitorum, l. 1. c. 34. §. 1. 9. 31. 32. 33. etc. Caes. Carena de Officio SS. Inquisit. §. 9. n. 59. §. 12. 14. 15. Alii laudati Phil. a Limborch Historiâ Inquisit. l. 3. c. 17.